سەرۆکی هەرێمی کوردستان پیرۆزبایی "جەژنی رۆژی" لە کوردانی ئێزدی دەکات و رایدەگەیێنێت، "بەداخەوە جەژنێکی دیکەش گەڕایەوە کە هێشتا ژمارەیەکی گەورەی کوردانی ئێزدی ئاوارەن و لە ژیانێكی زەحمەتدا دەژین." دەشڵێت، هەموو هەوڵێک دەدەن بۆ ئاشکراکردنی چارەنووسی رفێندراوەکان.
نێچیرڤان بارزانی، سەرۆکی هەرێمی کوردستان ئەمڕۆ پێنجشەممە، 15-12-2022، بە بۆنەی "جەژنی رۆژی"ـی کوردانی ئێزدی پەیامێکی پیرۆزبایی بڵاوکردەوە و ئەو جەژنەی لە میر حازم تەحسین بەگ، میری کوردانی ئێزدی، بابەشێخ، ئەنجوومەنی رۆحانیی ئێزدی و "هەموو خوشک و برایانی ئێزدی" پیرۆز کرد.
سەرۆکی هەرێمی کوردستان بۆ جەژنی ئەمساڵ هاوخەمیی خۆی نیشاندەدات کە تاوەکو ئێستاش "ژمارەیەکی گەورەی" کوردانی ئێزدی ئاوارەن و هەندێکیان لە کەمپەکان دەژین و نەگەڕاونەتەوە سەر ماڵ و حاڵی خۆیان.
نێچیرڤان بارزانی دەڵێت، هیوادارە کوردانی ئێزدی جەژن و پشووی خۆیان لە "رەوشێکی تەنا و ئارام دەرباز بکەن" و بۆ جەژنی داهاتووش هیوا دەخوازێت لە رەوشێکی باشتردا بکرێت.
بۆ ئەو ئاوارە ئێزدییانەی کە ئەمساڵ لەنێو کەمپەکان "جەژنی رۆژی" دەکەنەوە، سەرۆکی هەرێمی کوردستان دەڵێت، "دڵمان لەگەڵ ئەوانە و لە نزیکەوە ئاگاداری رەوش و ژیانی ئەوانین. پیرۆزباییەکی تایبەت لە هەموویان دەکەم."
لەبارەی ئەو هاونیشتمانییە ئێزدییانەی کە چاوەڕوانی کەسوکارە رفێندراوەکانیانن، نێچیرڤان بارزانی، سەرۆکی هەرێمی کوردستان لە پەیامەکەیدا "خوشک و برایانی ئێزدی" دڵنیا دەکاتەوە کە هەموو هەوڵێک بۆ رزگارکردن و ئاشکراکردنی چارەنووسیان دەدەن.
No comments:
Post a Comment